Baba-aartappels met Afrika-geure
Resep deur Herman Lensing
Herman sê: “Een van my ma gunstelinge om op haar feestafel te bedien, was gewone baba-aartappels, net so opgekook (soms in ’n swartpot oor die vuur) en dan met eenvoudige pietersielie en knoffelbotter. Ek maak hom bietjie meer modern. Die speseryemengsel staan bekend as ras el hanout.”
Genoeg vir 6-8 mense
750 g-sak baba-aartappels
10 ml fyn komyn
10 ml fyn gemmer
10 ml swartpeper
5 ml fyn koljandersaad
5 ml cayenne-peper
5 ml wonderpeper
3 ml fyn naeltjies
500 ml room
sout en varsgemaalde swartpeper
50 g parmesaankaas, fyngerasper
Halveer die aartappels en plaas in ‘n pot met koue water. Bring tot kookpunt en kook vir 25 tot 25 minute tot die aartappels sag en gaar is. Dreineer. Plaas al die speserye in ‘n groot pot oor lae hitte en roer tot dit geurig ruik, vir sowat 1 minuut. Voeg room by en verlaag die hitte. Laat prut vir 10 tot 12 minute of tot die mengsel met helfte verminder het. Geur goed met sout en peper. Gooi gaar aartappels by die room en meng deur. Besprinkel met parmesaankaas en keer uit op ‘n opdienbord. Sit voor.