Hoender-botterkerrie
Resep deur Herman Lensing
Herman sê: “Dit bly een van my lekkerste kerrieresepte en jy maak dit in ’n kits. Gebruik ontbeende hoenderdye.”
Genoeg vir 6
45 ml olyfolie
1 ui, fyngekap
2 knoffelhuisies, fyngekap
30 ml geroosterde masala
30 ml komynsaad
20 ml fyn koljander
20 ml vinkelsaad
1 x 400 ml-blik klappermelk
1 x 400 g-blik tamatiepuree
24 ontbeende hoenderdye
sout en varsgemaalde swartpeper
1 x 410 g-blik botterbone, gedreineer
hand vol vars koljander, fyngekap
100 g (110 ml) botter
Verhit oond tot 220°C. Verhit olie in ’n oondvaste swaarboomkastrol tot warm. Voeg ui en knoffel by en roerbraai 2 minute. Voeg speserye by, verlaag hitte en roerbraai vir vyf minute. Gooi ‘n bietjie water by as dit lyk of die speserye gaan brand. Voeg klappermelk en tamatiepuree by. Verhit weer tot kookpunt en plaas die hoender in die sous. Geur goed met sout en peper. Bak vir 35-40 minute onbedek of tot gaar. Voeg botterbone en vars koljander by en roer deur. Plaas die botter bo-op kerrie en laat dit smelt, maar moet dit nie inmeng nie. Sit voor met rys en ongegeurde jogurt.